Ծնվել է 2004 թ.
Խնդիրը` վարակ նախածննդյան շրջանում
Հաճախում է 2009 հունիսից առայսօր
Առաջընթացը գրանցվել է 2010 հուլիսին

Լիանա, մայրը. Նախածննդյան շրջանում Լևոնին վարակ էր անցել , որը բացասական անդրադարձավ նրա հետագա մտավոր զարգացման վրա: Նա այժմ չի խոսում: 2009թ.-ից սկսած Լեւոը ներգրավված է մի շարք վերականգնողական ծրագրերում, որոնց շարքում մեծ տեղ է զբաղեցնում հիփոթերապիան: Մենք այժմ որոշակի դրական փոփոխություններ ենք նկատում որդուս վարքագծում: Նա աստիճանաբար դառնում է ավելի կենտրոնացած, սովորում է կառավարել իր զգացմունքներն ու առավել դրական ընկալել իր շրջապատը: Նրա քայլքը դարձել է առավել հաստատուն ու կշռադատված, մի բան, որ բացակայում էր ամիսներ առաջ: Նա սիրում է կենդանիներին, հատկապես ձիերին: Ձմեռային ընդմիջումից հետո մեծ խանդվառությամբ վերսկսեց իր այցելությունները և հիփոթերապիայի պարապմունքները կենտրոնում:

Ծնվել է՝ 2001
Խնդիրը` ՄՈւԿ, թույլ մկաններ, խանգարված կոորդինացիա, առանց օգնության քայլելու անկարողույություն
Հաճախում է` 2009թ հունիսից առայսօր
2010թ հուլիսին

Լիլիա, մայրը. Դուստրս 8 տարեկան է: Նա ունի մանկական ուղեղային կաթված /ՄՈւԿ/ եւ նրա կորդինացիան խիստ խանգարված է: Վերականգնողական թերապիայի նոր մեթոդների իմ անդադար որոնումներն ինձ բերեցին այս կենտրոն: Ես շատ զարմացա այնտեղ հանդիպելով երկու երիտասարդների` Բորյային և Հասմիկին, ովքեր չնայած բոլոր դժվարություններին՝ աշխատում էին երեխաների հետ: Դստերս միանգամից դուր եկավ կենտրոնը: Կարծում եմ, նա այստեղ գտավ այն խաղաղ եւ անմիջական միջավայրը, որի կարիքն այնքան ունեն մեր երեխաները, մասնավորապես նրանք, ովքեր բնակվում են քաղաքներում:

Այստեղ Անին ոչ միայն վերականգնողական թերապիա է անցնում, այլեւ շփվում է բնության եւ ընտանի կենդանիների` ձիերի, այծերի, շների եւ կատուների հետ: Այստեղ իմ դուստրը հաղթահարեց իր վախը մեծ շների նկատմամբ: Ես չէի դադարում զարմանալ, թե որքան հանգիստ ու հնազանդ էին ձիերը այս պարապմունքների ընթացքում: Ավելի ուշ Հասմիկն ինձ բացատրեց, որ հիփոթերապիայի համար ընտրվում են հանգիստ ձիերը, եւ նրանց հատուկ վարժեցնում են երեխաների հետ աշխատելու համար:

Ծնվել է 2001 թ.
Խնդիրը՝ սպաստիկ տետրապարեզ
Հաճախում է 2008 դեկտեմբեր – 2009 դեկտեմբեր
Առաջընթացը գրանցվել է 2010 հուլիսին

Անուշ, մայրը. . Մենք շուրջ 1 տարի, փոքր ընդմիջումներով, հաճախել ենք հիփոթերապիայի պարապմունքներին: Զուգահեռ հաճախում էինք նաև Մանկական վերականգնողական կենտրոն: Հիպոթերապիան սկսելուց ընդամենը մեկ ամիս անց դրական փոփոխություններ նկատվեցին: Մեր ամենամեծ ձեռքբերումն այն էր, որ Լեւոնն այլեւս կարիք չուներ սպաստիկ մկանները թուլացնող դեղամիջոցների, որոնք ընդունում էր 2 տարի շարունակ: Մեծ ձեռքբերում էր նաև այն, որ տղաս սկսեց շրջվել մեջքից դեպի փոր, մինչդեռ նախկինում նա կարողանում էր անել միայն հակառակ գործողությունը: Ձեռքի ձգված մկանները զգալիորեն թուլացան: Թուլացան նաև ոտքի աճուկները, որոնք չափազանց լարված էին: Զգալիորեն բարելավվեցին նրա նստելու և կանգնելու հմտությունները: Սեղանի մոտ երեխան արդեն կարողանում է նստել առանց թիկնակ աթոռի վրա, մինչդեռ նախկինում նա ոչ միայն կարիք ուներ թիկնաթոռի, այլեւ կողքից լրացուցիչ օգնության, իսկ կանգնելիս` հենվում էր սեղանին: Երկու ձեռքերից բռնած քայլելիս նա շատ ավելի պակաս է խաչաձևում ոտքերը:

Ծնվել է 2003 թ.
Խնդիրը՝ աուտիզմ
Հաճախում է 2008 Նոյեմբեր – 2009 դեկտեմբեր
Առաջընթացը գրանցվել է 2009 հոկտեմբերին

Mother Lusine: Ես սկսեցի տղայիս տանել տարբեր մասնագետների մոտ 1.5 տարեկանից, երբ նա սկսեց աստիճանաբար կորցնել խոսքը, աչքերի կոնտակտը և գրեթե ամբողջովին ռեակցիան արտաքին շրջապատի հանդեպ: Ժամանակն անցնում էր, բայց տղայիս վիճակը չէր լավանում: Որոշ դեպքերում նա իրեն դրսևորում էր ուղղակի հանճարի պես. օրինակ՝ պաշտում էր կարդալը և կարդում էր՝ իրոք հասկանալով կարդացածը, չնայած ոչ ոք երբեք իրեն չէր սովորեցրել կարդալ: Կամ կատվի նման զգում էր մարդուն, ով ունի առողջական խնդիրներ կամ երբ ինչ-որ վատ բան պիտի պատահեր: Բայց մյուս կողմից չուներ ոչ մի պրակտիկ և շփման հմտություն՝ ինքնուրույն չէր ուտում, չէր օգտվում զուգարանից, խուսափում էր մարդաշատ վայրերից, հրաժարվում էր հասարակական տրանսպորտով երթևեկելուց...